ازاي تبقي فريلانسر وايه اهم الملفات اللي محتاجها.

ازاي تبقي فريلانسر وايه اهم الملفات اللي محتاجها.

    3 ملفات مهمين لازم كل شخص عايز يبقى فريلانسر يشتغل عليهم ويحدثهم بشكل مستمر

    ..

    عشان تشتغل بشكل فريلانس، محتاج تتعامل مع العمل الحر بنفس جدية التعامل مع الوظيفة البارت أو فول تايم، ودا هيخليك في معظم الأحوال محتاج تستثمر وقت ومجهود وأحيانًا فلوس عشان تشتغل وتجيب عملاء تقدم ليهم خدماتك بشكل مستقل.

    ..

    خطوة مهمة من الخطوات اللازم القيام بيها والمتعلقة باستثمار الوقت والمجهود للحصول على عملاء، هي أن يبقى عندك ثلاث ملفات أساسين بتحدثهم كل شوية. الملفات دي كالآتي:

    1 - ملف الـ «Leads»، ودول العملاء المحتملين اللي ممكن يشتغلوا معاك وتقدم ليهم خدماتك. ناس اشتغلت معاهم قبل كدا، اتعرفت عليهم في ايفنت أو مؤتمر، كان في بينك وبينهم أي وسيلة تواصل، تفاعلوا مع المحتوى اللي بتقدموا، وصلت انت ليهم من خلال عمليات بحث واستهداف .. إلخ. الفايل دا يكون فيه اسم الشخص، ومنصبه، والشركة أو المكان اللي بيمثله، وشوية معلومات عنه تساعدك بعد كدا انك تحاول تحوله لعميل فعلي بأي طريقة تسويقية مناسبة. ممكن تستخدم أي برنامج CRM بس انا شخصيا بفضل استخدام الـ excel أو google sheets .. جميلة كدا وبتحتوي الفريلانسر وسهل التعامل معاها. ومتنساش في الشيت دا تضيف عمود يوضح امته آخر مرة حصل كونتاكت بينك وبين كل شخص وكانت نتيجته ايه. 

    ..

    2 - تاني ملف دا يكون مخصص للفريلانسرز زملاء المهنة. كونك شخص مستقل معناه ان انت شركة بس شركة عبارة عن شخص واحد، وبالتالي وارد جدًا في أي لحظة يجيلك عميل ويطلب منك شغل يتخطى قدرتك الاستيعابية على العمل، وفي الحالة دي هتحتاج ناس تساعدك عشان تقوم بالشغل المطلوب. هنا يجي دور الملف دا، واللي هيساعدك تتصرف بسرعة شديدة وهتكون مستعد لقبول أي عمل أيًا كان حجمه. الملف دا يكون شامل اسم الشخص ووسائل التواصل معاه ونماذج أعماله ومجال خبرته وأكثر حاجة هو برنس فيها ومتوسط أسعاره كام. يعني لو انت مصمم جرافيك، وليك ثلاثة زملاء آخرين بيشتغلوا فريلانس محتاج تضيفهم للشيت وتصنف كل شخص شاطر في انهي جزء، مين أشطر في اللوجو، ومين في السوشيال ميديا وكل واحد سعره كام.. بالتالي كل عميل هيجيلك وهتحب تجيب ناس تشتغل معاك وتساعدك هتعرف تختار بناء على خبرة كل شخص في الفايل ومتوسط اسعاره اذا كان مناسب ليك. 

    ..

    3 - ثالث ملف محتاج يكون معاك وبتحدثه باستمرار يخص التوثيق وقياس أدائك كشخص مستقل. محتاج ملف بتسجل فيه كل شخص بتشتغل معاه وبيانات التواصل معاه وطبيعة المشروع، وأخد منك كام ساعة شغل والمقابل بتاعه كان كام واستلمته ازاي ولينكات الشغل اللي سلمته للعميل. ليه الملف دا مهم؟ عشان تعرف انت بتشتغل كام ساعة في الشهر أو في الأسبوع، وأنهي نوع مشاريع بتكسب منه أكثر، وايه أكثر وسيلة بتحصل منها على فلوس ويكون عمولتها أقل، وأنهي نوع من العملاء بيشتغل معاك بشكل مستمر عن التاني وهل في عملاء بيرجعوا يشتغلوا معاك تاني ولا كل واحد مشروع وبيختفي. الملف دا هيساعدك بمعلومات كتير جدًا تخليك تطور من أسلوب شغلك وتركز أكثر على العملاء والمشاريع اللي بيستهلكوا ساعات عمل أقل بعائد ومقابل أعلى.

    ..

    غالبًا انت مش هتشتغل على الإنترنت أو بشكل مستقل وانت قاعد في البيت ومجرد عايز تشتغل وخلاص بدون ما تبذل أي مجهود. زي ما بتدور على شغل ثابت انت بردو محتاج تبذل نفس المجهود لكن بذكاء عشان تدور على عملاء ليك وكل ما كنت بتستثمر وقتك في البحث بشكل سليم وبتوثق كل معلومة تعرفها وكل خطوة بتعملها كل ما هيكون أدائك أفضل وهتلاقي نفسك بتتحول مع الوقت من كونك شخص مستقل إلى شركة معتمدة على العمل الحر بشكل كامل.

    إرسال تعليق