حاول تبقى ابن ناس

حاول تبقى ابن ناس

    حاول تبقا ابن ناس

    - إبن الناس اللى بجد ممكن لبسه ما يكونش غالى بس شيك و لايق ع بعضه

    - إبن الناس اللى بجد بيتكسف وهو بيطلب من ابوه فلوس عشان عارف الظروف

    - لو كان حوش كان ممكن يجيب عربية محندقة نصف عُمر ولو حتى 128 بس هو كان بيحوش عشان يعمل مصلحة اول بأول بكل مبلغ يتجمع معاه .. مرة يشترى لبس .. مرة يطلع بيه رحلة ف الصيف عشان ما يتقلش ع اهله .. مرة يجيب بيه موبايل جديد مش الاحدث لكن قبله بموديلين تلاتة

    - إبن الناس اللى بجد نُزهى و مش بيخلى حاجة ناقصاه

    - لانه مش ملاك فأبن الناس اللى بجد بيغلط ولانه برضه مش شيطان دايما بتوجعه النغزة اللى جواه دى واللى بتحسسه دايما ان فيه حاجة غلط

    - ابو ابن الناس اللى بجد ولانه هو نفسه ابن ناس بجد مدخلش ابنه مدرسة لغات عشان عارف انه مش هيقدر يعمل المثل مع باقى اخواته فقرر يعلم الكل تعليم عادى بدل ما يميز واحد عن الباقى

    - بنت الناس اللى بجد وعشان هى مخها كبير مش بيفرق معاها صاحبتها اللى بتعمل لها بلوك بعد ما تتخطب 

    - إبن الناس اللى بجد إبن بلد بجد فـ نفس الوقت ومهما كان بينك وبينه خلاف بتلاقيه واقف معاك وقت الشدة 

    - بنت الناس اللى بجد بتكون أم لـ أخواتها .. أعرف صديقة باعت موبايلها عشان تجيب لـ أخوها مضرب وطقم تنس كان نفسه فيهم فـ عيد ميلاده وقالت مش مهم واستخدمت موبايلها النوكيا القديم وقالت ده موبايل وده موبايل !

    - إبن الناس اللى بجد مش بيبص للى فـ إيد غيره ولو حصل بيكون عشان يعلّى سقف طموحه للى شايفه بدون ما يتمنى زواله مـ غيره

    - إبن الناس اللي بجد مابيعليش صوته ع مراته وسط الناس ولا مشاكل بيتهم بتطلع بره 

    - إبن أو بنت الناس اللى بجد لما حد يقوله كلمه حلوه ف حقه بيخجل منها و بيشوف نفسه اقل من كده

    - إبن الناس اللى بجد أقل حاجة تضايقه وأقل منها تبسطه 

    - إبن الناس اللى بجد جزء مش قليل من اللى فـ إيده مش ليه 

    - إبن الناس اللى بجد ممكن جدا ما يكونش ف كلية قمة .. بس وارد تلاقيه طلع م الاوائل ف دراسته

    - إبن الناس اللى بجد فهم التيته من اولها وعرف ان المستقبل مش ف شهادة تتعلق ع الحيط ونزل يشتغل عشان يشيل نفسه بنفسه

    جايز ولاد الناس بيتصنفوا من مظهرهم وشكلهم ومستواهم بس ولاد الناس اللى بجد بيتصنفوا من جواهم .. اصل كل الناس ولاد ناس .. بس مش كلهم ولاد ناس بجد 

    الموضوع من طرف الاء عاطف

    إرسال تعليق