موجود: الموقع الاخباري الأصدق في مصر | Mawgoud موجود: الموقع الاخباري الأصدق في مصر | Mawgoud
اخبار

آخر الأخبار

اخبار
جاري التحميل ...

تعرف على فيسبوك أكثر ! احذر الموبايل الاحمر بيتقشر 😱

تحذير من الموبايل الاخضر عشان فيه عيوب قاتلة! 
احذر الموبايل الاحمر بيتقشر 😱 
اما بقي الموبايل البرتقاني فكاميرته طلعت بلح!

في وقتنا الحالي و مع التنافس القوي جدا بين الشركات و طحن بعض في السوق ,, و مع بداية ظهور جروبات المستخدمين و بدأت كل شركة تبقي راعية لجروب خاص بيها بدأ يظهر لنا بشكل ملحوظ الوجه القبيح للتسويق!

الشكل القبيح ده بيتمثل في انك بقيت تشوف شبه حملات منظمة علي شركات معينة او موبايل معين بشكل منظم و غريب جدا علي الجروبات دي ..

تلاقي اكونتات كتير بتنشر نفس الحاجة علي الجروبات .. تلاقي قصص خزعبلية عن موبايل كان محطوط علي التربيزة و سبحان الله ظهر فية انبعاجات و اتني و اتدمر من غير اي حاجة..

مثلا بقالي يومين بشوف صور متكررة من اكونتات كتير عن صورة متصورة بموبايل Redmi Note 5 اللي هينزل جديد بتبين اد ايه اداءه الليلي سئ عكس ما بتقول الشركة ,, الامر كان طبيعي في البداية لحد ما بدأت الاحظ انه الصورة قاعدة تلف الجروبات بتعليقات مشابهة باكونتات كتير.

تناول موضوع زي موضوع تلاعب البنشمارك في ال Oppo F7 كان مثال اخر علي الوجه القبيح للتسويق الخفي و الغير اخلاقي من المنافسين. 

فاخبار التلاعب دي حاجة مش جديدة و حصلت كذا مرة او بمعني تاني في شركات اتهمت بالموضوع ده كذا مرة ابرزهم مثلا سامسونج, بل سامسونج قبل كدا اتهمت اصلا بانها بتمول Antutu Benchmark من اساسه..

لكن تناول الموضوع و نشره بشكل مكثف و خلاص كأن الموبايل بقي سئ للغاية و اللي هو خلاص بقي موبايل زفت عشان حاجة زي دي متجاهلين انه الموبايل بعيدا عن اي حاجة مازال اداءه جيد جدا و اصلا نظريا المعالج قوي ( بنتكلم في معالج بانوية رائدة Cortex A73 و دقة تصنيع 12 نانومتر يعني )

- تناول بردو في فترة عيوب عن الMate 10 Lite من هواوي كان مريب فلقيت فجأة بوستات بتتنشر عن عيوب بشكل مكثف و متزامن و فيه شئ من التشابه ,, الموبايل بيقشر الموبايل بينحني الموبايل بيظهر فيه انبعاجات في الظهر لوحده! 

( خلينا نتفق انه بعض الشكاوي صحيحة و فعلا البعض بيعاني من موضوع التقشير ده ) 

لكن استغلال البعض للموضوع بشكل و تكثيفه و تكبيره عشان يدي انطباع للناس انه العيوب في كل مكان.

الضرب في CarlCare ضمان و توكيل انفنكس و تكنو و ان كان فعلا سمعته سيئة و في شكاوي حقيقية منه ,, لكن بلا شك كان في تضخيم لدرجة انه البعض عمل صفحة و عمل بوستات هجوم علي التوكيل ممولة!

اللي يتابع كويس اليومين دول جروبات المستخدمين هيلاحظ جيوش حسابات مزيفة بتطلع تقعد تشتم موبايل او تنزل شكاوي مزيفة..

يمكن بردو عالميا ساعات بتحصل حاجات زي كدا فنلاقي عيوب فردية للايفون بيتم تكثيف نشرها و تسليط الضوء عليها بشكل قوي و تلاقي عيب عند سامسونج فردي بردو يتم تسليط الضوء عليه ..

الحرب دي اللي بتتم بشكل خفي و من وراء حسابات مزيفة او من تحت الترابيزة .. حرب غير اخلاقية هدفها تدمير السمعة و لأن ببساطة الناس العادية البسيطة هتخاف علي فلوسها لما تسمع عيب هنا ولا عيب هنا ,, و بذات لما تلاقي في جيش شكاوي و جيش حسابات قاعدة تشتم في موبايل.

حرب يمكن كنا بنشوفها في السياسة بفكرة " اللجان الالكترونية " اللي بيتم تجيشها من قبل كل الجهات عشان تزق خبر معين و تضخمه او تشتم شخص او فئة معينة عشان تدي صورة عامة و تسقطها نفسيا و معنويا عند الناس .. هي هي بتستخدم حاليا في مجالنا و بين الشركات من تحت لتحت من غير ما حد يعرف مين اللي بيعمل كدا و ايه اللي بيحصل ..

عشان كدا لازم نبقي منتبهين كويس انه حرب الاشاعات و حرب التزوير هي اسلوب جديد مستخدم في كل المجالات بيعتمد علي اسقاط الشئ بشكل معنوي من خلال نشر الاشاعات و الاخبار المزيفة.. و بقي في ابتكار في الموضوع.

متصدقش اي شئ تشوفه قدامك غير لو انت واثق في الشخص اللي بيتكلم و حلل كل حاجة بعقلك الاول.

لما تلاقي شكاوي من شئ او حسابات بتشتم اتأكد انها الاول ناس حقيقية مش اكونت لا في صورة ولا بيانات و معمول من كام شهر و فاضي. 

دقق في تفاصيل الشكوي عشان الشكاوي المزيفة بتبان غير منطقية. تاني متصدقش كل حاجة بل لما تلاقي حاجة عمالة تتنشر كتير و بشكل مريب شك فيها اكتر ..

خلينا دايما نحارب احنا بمحتوي نظيف و وعي ضد الحرب الغير اخلاقية دي!
------------
الموضوع من قبل احمد مدحت

عن الكاتب

محمد بدوي

التعليقات


اتصل بنا

إذا أعجبك محتوى موقعنا نتمنى البقاء على تواصل دائم ، فقط قم بإدخال بريدك الإلكتروني للإشتراك في بريد الموقع السريع ليصلك جديد الموقع أولاً بأول ، كما يمكنك إرسال رساله بالضغط على الزر المجاور ...